Afri Udhëzuesi

I

Çfarë thua mbetet mes jush

Fshehtëzimi, identiteti dhe thirrjet.

01Fshehtëzimi

Vetëm marrësi e lexon.

Çdo mesazh fshehtëzohet në telefonin tënd me Protokollin Signal, me shkëmbim çelësash post-kuantik (PQXDH). Fotot, videot, mesazhet zanore dhe skedarët fshehtëzohen në telefon me AES-256-GCM, dhe çelësi i tyre udhëton vetëm brenda mesazhit Signal. I hap vetëm marrësi: as Afri, as serverat e tij s’i lexojnë dot.

Biseda me Elsa Leka: lart shënimi që mesazhet dhe thirrjet janë të fshehtëzuara skaj-më-skaj; poshtë një thirrje zanore, një mesazh sensitiv i mbuluar dhe një mesazh i vulosur.

Të mbron ngaNjë server i komprometuar, përgjimi në rrjet dhe kushdo që do t’i lexonte bisedat gjatë rrugës, përfshirë vetë Afri-n.

Si ta përdorësh

S’ke asgjë për të ndezur: fshehtëzimi është gjithmonë aktiv, në çdo bisedë dhe grup.
Foto, video dhe skedarë i dërgon nga ikona e fotos në fushën e shkrimit; skedarët mund të jenë deri 25 MB.
Në krye të bisedës, Afri të fton ta verifikosh numrin e sigurisë një herë. Si bëhet, e sheh më poshtë.

Kufiri

Post-kuantik është shkëmbimi i çelësave kur nis një bisedë; thirrjet, vendndodhja dhe backup-i përdorin fshehtëzim klasik. Serveri sheh metadata (kush i shkruan kujt, kur dhe sa i madh është mesazhi) por jo përmbajtjen. Media e dërguar me versionet e para të Afri-t, para se të fshehtëzohej skaj-më-skaj, është hequr nga serveri.

Nën kapaklibsignal 0.86.5 · PQXDH (X25519 + ML-KEM-1024) · Double Ratchet · media me AES-256-GCM · çelësat të mbyllur me Android Keystore

02Identiteti

E di me kë po flet.

Çdo kontakt mund ta verifikosh sy më sy me numrin e sigurisë. Nëse çelësi i tij ndryshon papritur, dërgimi ndalet derisa ta verifikosh sërish.

Cilësimet › Afri Guard: Verifikim strikt i identitetit i ndezur, pa dërgim kur ndryshon çelësi i kontaktit derisa ta verifikosh.

Të mbron ngaDikush që ndërhyn në mes të bisedës, ose që hiqet si kontakti yt nga një telefon tjetër.

Si ta përdorësh

Në bisedë prek dhe Verifiko … (me emrin e kontaktit).
Krahasoni 60 shifrat personalisht ose përmes një kanali tjetër që i besoni.
Nëse përputhen, prek Përputhen — shëno si të verifikuar.

Kufiri

Numri krahasohet me sy; s’ka skanim QR për verifikimin. Para verifikimit, Afri i beson çelësit të parë që sheh. Verifikim strikt i identitetit është i ndezur si parazgjedhje dhe gjendet te Cilësimet, Afri Guard.

Nën kapakNumri i sigurisë: NumericFingerprintGenerator i libsignal · 60 shifra

03Thirrjet

Thirrje që s’ta zbulojnë adresën.

Thirrjet zanore dhe video janë të fshehtëzuara skaj-më-skaj dhe kalojnë gjithmonë përmes serverit rele të vetë Afri-t në Gjermani, ndaj personi me të cilin flet nuk e mëson kurrë adresën tënde IP.

Thirrje zanore me Dea Kola: vula me katër planetë, etiketa “E verifikuar sy më sy · E2E” dhe “Linjë e mirë”.

Të mbron ngaDikush që do të të gjente vendndodhjen përmes një thirrjeje, dhe thirrjet nga të panjohurit: të thërrasin vetëm lidhjet që ke pranuar, dhe telefoni bie vetëm nëse nënshkrimi i thirrësit verifikohet.

Si ta përdorësh

Në një bisedë 1:1 prek ikonën e telefonit dhe zgjidh Thirrje zanore ose Thirrje video.
Gjatë thirrjes prek vulën: të dy telefonat vizatojnë të njëjtët katër planetë nga çelësat e thirrjes. Krahasojini me zë ose në kamerë.
Nëse e ke verifikuar kontaktin, nën emër shfaqet E verifikuar sy më sy · E2E.

Kufiri

Releja e Afri-t dhe Google (Firebase) e shohin adresën tënde IP; releja përcjell vetëm media të fshehtëzuar. Thirrjet janë vetëm 1:1: s’ka thirrje në grup.

Nën kapakWebRTC · DTLS-SRTP · vetëm përmes relesë · oferta e thirrjes e nënshkruar me çelësin e identitetit · vula e thirrjes nga gjurmët DTLS, me Argon2id

II

Ti vendos kush të arrin

Lidhjet, Afri Guest dhe njoftimet.

04Lidhjet

Të shkruajnë vetëm ata që pranon ti.

Afri nuk kërkon numër telefoni dhe nuk lexon kontaktet e telefonit. Askush s’të gjen me kërkim nëse s’e lejon ti, dhe vetëm lidhjet që ke pranuar mund të të shkruajnë ose të të telefonojnë.

Kreu i Afri-t: një kërkesë e re në pritje me butonat Refuzo dhe Prano, dhe bisedat me parapamjet “Mesazh i vulosur” dhe “Thirrje video”.

Të mbron ngaSpam-i, ngacmimi dhe të panjohurit që të gjejnë përmes numrit të telefonit.

Si ta përdorësh

Prek ikonën QR në krye të Lidhjet: trego QR-në tënde, skano atë të tjetrit ose prek Ndaj linkun. Çdo link ftese vlen vetëm një herë; QR-ja jote nuk skadon, ndaj tregoja vetëm atyre që do.
Kërkesat e reja dalin te Në pritje: Prano ose Refuzo.
Të më gjejnë me username është i fikur si parazgjedhje; ndize vetëm nëse do që të të gjejnë me username-in e plotë.

Kufiri

Llogaria kërkon një adresë email-i, të cilën serveri e njeh. Kush e ke pranuar mund ta përcjellë ose ta fotografojë atë që i dërgon.

Nën kapakPa leje për kontaktet, numrin e telefonit apo SMS-të · profilet s’mund të listohen · linqet e ftesës përdoren një herë

05Afri Guest

Bisedë private me dikë që s’e ka Afri.

I dërgon një link dhe, veçmas, një PIN me 8 shifra. Personi hyn nga shfletuesi vetëm pasi e lejon ti, dhe kur biseda mbyllet nuk mbetet asnjë histori.

Afri Guest: përgatitja e hyrjes me afatin e ftesës, kohëzgjatjen e bisedës, PIN-in me 8 shifra dhe butonin Krijo ftesë.

Të mbron ngaDetyrimi për ta zhvendosur një bisedë delikate në një kanal më pak të sigurt, vetëm sepse tjetri s’e ka Afri.

Si ta përdorësh

Hap Guest, zgjidh Afati i ftesës dhe Kohëzgjatja e bisedës, pastaj prek Krijo ftesë.
Dërgo linkun; PIN-in jepja veçmas, nga një kanal tjetër.
Mirato mysafirin që pret, pastaj krahasoni vulën e seancës: të dy duhet të shihni të njëjtët katër planetë.

Kufiri

Vetëm tekst: pa thirrje, foto apo skedarë. Emri i mysafirit është i deklaruar, jo i verifikuar, dhe shfletuesi s’i bllokon pamjet e ekranit. Hyrjen e mysafirit e kontrollon Google reCAPTCHA, jo mesazhet. Serveri i Guest mban metadata minimale të seancës për rreth 24 orë, dhe raportimet e abuzimit për 30 ditë.

Nën kapakSekretet e linkut pas “#” s’arrijnë kurrë te serveri · sinjalizim JWE A256GCM · vetëm përmes relesë · 5 PIN të gabuar e anulojnë ftesën

06Njoftimet

Ekrani i kyçur tregon vetëm “Afri”.

Si parazgjedhje njoftimet thonë vetëm “Afri”, pa emër dhe pa tekst. Nëse zgjedh ta shohësh mesazhin, ai deshifrohet vetëm në telefonin tënd, kurrë nga serveri.

0Vetëm Afri parazgjedhjePa emër, pa mesazh
1Vetëm emriEmri i kontaktit, pa mesazh
2Emri dhe mesazhiDeshifrohet vetëm në këtë telefon. Kush e sheh të zhbllokuar, e lexon.

Të mbron ngaSytë mbi supin tënd: në tavolinë, në takim, në makinë.

Si ta përdorësh

Hap Cilësimet, Njoftime.
Te Në njoftim shfaqet zgjidh nivelin që të përshtatet.

Kufiri

Thirrja hyrëse dhe SOS-i tregojnë gjithmonë emrin, në çdo nivel, që ta dish kush të kërkon. Google (FCM) sheh që të erdhi një njoftim, kur dhe për cilën bisedë (me një id, jo me emër); në versionet e reja, një kopje e fshehtëzuar e mesazhit mund të udhëtojë brenda njoftimit, që Google e sheh vetëm si tekst të fshehtëzuar.

Nën kapakNjoftimi nga serveri s’mban emër, id të dërguesit apo tekst të lexueshëm · kopja brenda njoftimit mbushet në madhësi fikse

III

Çfarë shihet, dhe për sa kohë

Ekrani, mesazhet që zhduken dhe Vula.

07Ekrani

Çfarë shfaqet, mbetet e jotja.

Pamjet dhe regjistrimi i ekranit bllokohen në të gjithë Afri-n. Mesazhet sensitive dhe çdo foto, video ose skedar që merr mbeten të mbuluara derisa t’i hapësh me gjurmë ose PIN, dhe mbulohen sërish sapo largohesh.

Lista e bisedave: parapamjet shkruajnë “Mesazh sensitiv” dhe “Mesazh i vulosur” në vend të tekstit.

Të mbron ngaNjë pamje ekrani që del nga dora, një aplikacion që regjistron ekranin, dhe dikush që e merr për një çast telefonin tënd të hapur.

Si ta përdorësh

Për ta dërguar një mesazh si sensitiv, prek drynin majtas në fushën e shkrimit: fusha shkruan Mesazh sensitiv….
Marrësi e sheh të mbuluar dhe e hap me gjurmë ose PIN; pas pak sekondash mbulohet sërish.
Fotot, videot dhe skedarët që merr hapen po ashtu vetëm pas gjurmës ose PIN-it.

Kufiri

Një foto me një kamerë tjetër është gjithmonë e mundur. Serveri e di që një mesazh është shënuar sensitiv ose që është foto, video a skedar, por jo përmbajtjen. Mesazhet e zakonshme me tekst nuk kyçen.

Nën kapakFLAG_SECURE në çdo dritare, dialog dhe fletë · një mesazh sensitiv mbetet i hapur 8 sekonda (10 më së shumti) · sensitivet s’kërkohen dhe s’hyjnë në backup

08Mesazhe që zhduken

Mesazhe me afat.

Mesazhet mund të zhduken vetë pas 1 ore, 24 orësh ose 7 ditësh. Afatin e detyron serveri, që i fshin mesazhet kur skadojnë.

Fikur
Pas 1 ore
Pas 24 orësh
Pas 7 ditësh

Të mbron ngaHistoriku që grumbullohet me vite dhe që dikush mund ta gjejë më vonë.

Si ta përdorësh

Në bisedë prek dhe Mesazhe që zhduken.
Zgjidh Pas 1 ore, Pas 24 orësh ose Pas 7 ditësh.

Kufiri

Serveri fshin çdo 30 minuta, ndaj një mesazh mund të mbetet deri rreth gjysmë ore pas afatit. Fshi mesazhin e heq nga të dy telefonat, por kopja e fshehtëzuar mbetet në server derisa të skadojë ose të fshihet biseda. Fotot, videot dhe skedarët e dërguar me Afri 3.0-b290 e më të ri fshihen nga serveri bashkë me mesazhin (kur skadon ose kur e fshin për të gjithë); ata të versioneve më të vjetra mbeten derisa të fshihet biseda ose llogaria. Kushdo mund ta fotografojë ekranin me një pajisje tjetër.

Nën kapakRregullat e serverit lejojnë vetëm: fikur, 1 orë, 24 orë, 7 ditë · mesazhet që zhduken s’hyjnë në backup dhe teksti i tyre s’shfaqet kurrë në njoftime

09Vula

Një mesazh që pret vendin ose orën e duhur.

Me Vulën, një mesazh hapet vetëm kur marrësi arrin te vendi që zgjodhe ose kur vjen ora që caktove. Vendi dhe përmbajtja udhëtojnë brenda mesazhit të fshehtëzuar.

Fleta “Vulos mesazhin”: hapet vetëm kur Mira të mbërrijë këtu; zgjedhja Vend ose Kohë, harta me rrezen 150 m dhe butoni Vulos & Dërgo.

Biseda me Mira Shehu: një urim ditëlindjeje i dërguar me vulë kohe, i shënuar “E vulosur”.

E dobishme përUdhëzime që duhen lexuar vetëm në vend, ose një urim që s’duhet hapur para kohe.

Si ta përdorësh

Prek vulën djathtas në fushën e shkrimit.
Zgjidh Vend (lëviz hartën dhe rrezen) ose Kohë.
Shkruaj mesazhin dhe prek Vulos & Dërgo.

Kufiri

Vulën e zbaton aplikacioni i marrësit: është vulë sjelljeje, jo kasafortë matematikore. Në versionin nga Google Play, vula e vendit hapet kur marrësi e hap bisedën në atë vend.

Nën kapakVendi dhe përmbajtja udhëtojnë të fshehtëzuara brenda mesazhit · vulat s’kërkohen dhe s’shfaqen në parapamje

IV

Kur telefoni s’është në dorën tënde

Kyçja, PIN-i i panikut, telefoni i humbur dhe Kodi i Rikuperimit.

10Kyçja

Kyçet sapo e lë nga dora.

Afri hapet vetëm me PIN ose biometrikë dhe kyçet sapo del prej tij ose fiket ekrani. PIN-i i panikut duket si hyrje e zakonshme, por fshin menjëherë çelësat dhe të dhënat e Afri-t në atë telefon, edhe pa internet.

Ekrani i kyçjes: “Afri është i kyçur”, tastiera e PIN-it dhe “Harrova PIN-in”.

Të mbron ngaDikush që të detyron ta hapësh telefonin, ose që e gjen të hapur për një çast.

Si ta përdorësh

Cilësimet, Siguria, Kyçja e app-it: zgjidh Biometrike + PIN.
Po aty, PIN i panikut: vendos një PIN të dytë që s’e përdor kurrë në jetën e përditshme.
Nëse do, ndiz Djeg pas 10 tentativash: pas 10 PIN-esh të gabuar fshihen të dhënat lokale.

Kufiri

PIN-i i panikut s’hap një Afri të rremë dhe s’fshin llogarinë apo kopjet në telefonat e të tjerëve; pastrimi në server pas tij bëhet me përpjekje të kufizuar. Kur ka lidhje, heq edhe çelësat e tu nga serveri: çelësat dhe bisedat e vjetra s’rikthehen më, as me Kodin e Rikuperimit. Qendra e Sigurisë mund ta bllokojë a ta fshijë llogarinë edhe pas tij. Një shërbim aksesueshmërie që e ke lejuar vetë mund t’i lexojë shifrat e PIN-it; kur është ndezur një i tillë që s’është mjet aksesueshmërie i ardhur me telefonin, pad-i e thotë — si shenjë, jo si garanci. Asgjë s’mbron atë që është parë ose fotografuar tashmë.

Nën kapakPIN-i ruhet si hash Argon2id (64 MiB) · të dy PIN-et luajnë të njëjtin animacion · kyçja është e detyrueshme

11Telefoni i humbur

Bllokoje ose fshije nga çdo shfletues.

Nëse të humbet telefoni, nga çdo shfletues mund ta bllokosh me @username-in dhe Kodin e Rikuperimit, ose ta fshish tërësisht me Kodin e Fshirjes, që është kod më vete.

Cilësimet › Siguria: Kyçja e app-it me Biometrike + PIN, PIN i panikut aktiv, Djeg pas 10 tentativash, Kodi i rikuperimit dhe Kodi i fshirjes.

Të mbron ngaNjë telefon i vjedhur që dikush përpiqet ta hapë më vonë.

Si ta përdorësh

Sot, jo nesër: te Cilësimet, Siguria krijo Kodi i rikuperimit dhe Kodi i fshirjes. Ruaji jashtë telefonit.
Kur të duhet, hap Qendrën e Sigurisë dhe fut @username-in me kodin përkatës.
Blloko pajisjen e ngrin Afri-n në atë telefon; Fshi gjithçka e fshin llogarinë.

Hap Qendrën e Sigurisë

Kufiri

Fshirja nga distanca e heq llogarinë menjëherë; vetë telefoni pastrohet kur lidhet sërish me internetin. Kodet duhen krijuar para se të të duhen. Ato vlejnë edhe pas një PIN-i paniku.

Nën kapakKodi i fshirjes: 256 bit, i ndarë nga Kodi i rikuperimit · Kodi i rikuperimit provohet vetëm si dëshmi njohjeje

12Kodi i Rikuperimit

Telefon i ri. Po ti.

Kodi i Rikuperimit është një çelës 256-bit që e ke vetëm ti. Në një telefon të ri ai të rikthen çelësat e llogarisë; nëse ke ndezur edhe backup-in e historikut, që është i fikur si parazgjedhje, kthehen edhe mesazhet e zakonshme.

Cilësimet › Siguria: Kodi i rikuperimit dhe Kodi i fshirjes; “Të më gjejnë me username” dhe Backup i historikut, të dy të fikur; Kush merr SOS-in.

Të mbron ngaHumbja e identitetit tënd të fshehtëzuar bashkë me një telefon të humbur, të vjedhur ose të prishur.

Si ta përdorësh

Te Cilësimet, Siguria hap Kodi i rikuperimit dhe ruaje kodin jashtë telefonit: në letër ose në një menaxher fjalëkalimesh.
Nëse do të të kthehen edhe bisedat, ndiz po aty Backup i historikut.
Në telefonin e ri, hyr në llogari dhe përdor Rivendos me kod me Kodin e Rikuperimit.

Kufiri

Askush s’ta kthen dot kodin, as ne: pa të, çelësat e vjetër s’rikthehen. Backup-i s’përfshin kurrë media, mesazhe sensitive apo që zhduken, dhe kush ka edhe backup-in edhe Kodin tënd të Rikuperimit mund ta lexojë. Fikja e backup-it ndalon kopjet e reja; ato të mëparshmet mbeten.

Nën kapakKodi i Rikuperimit: 256 bit, i forcuar me Argon2id · çelësi i rikuperimit ruhet i mbyllur me AES-GCM nën kodin tënd · serveri mban vetëm një hash një-drejtimësh të kodit

V

Kur ka rrezik

SOS-i, vendndodhja live dhe Afri Guard.

13SOS

Një rrëshqitje, dhe njerëzit e tu e dinë.

Me një rrëshqitje, SOS-i njofton njerëzit që ke zgjedhur (derisa të zgjedhësh, të gjitha lidhjet), me emrin tënd, dhe u ndan vendndodhjen tënde të fshehtëzuar live për 60 minuta ose derisa të prekësh “Jam mirë”.

Ekrani SOS: “Urgjencë, rrëshqit lart për urgjencë” për të gjitha lidhjet, shënimi që Afri nuk është shërbim urgjence dhe butoni 112.

Të mbron ngaÇasti kur s’ke kohë të shkruash, as të shpjegosh.

Si ta përdorësh

Zgjidh që sot: Cilësimet, Siguria, Kush merr SOS-in. Pa zgjedhje, e marrin të gjitha lidhjet.
Prek SOS në krye të Lidhjet dhe rrëshqit lart.
Kur je mirë, prek Jam mirë.

Kufiri

Afri nuk është shërbim urgjence: nuk thërret 112, nuk njofton autoritetet dhe ka nevojë për internet. Njoftimi i SOS-it nuk e kapërcen “Mos shqetëso”. Deri në 6 SOS në orë.

Nën kapakVendndodhja fshehtëzohet për çdo marrës, GPS çdo 2 sekonda gjatë SOS-it · serveri s’e di vendndodhjen · rekordi i SOS-it fshihet pas 24 orësh

14Vendndodhja

Vendndodhja jote, me afat dhe me pëlqim.

E ndan vetëm kur e zgjedh ti, vetëm me kë zgjedh ti, për 15 minuta, 1 orë ose 24 orë. Koordinatat fshehtëzohen për çdo shikues, dhe te “Kush më sheh” e ndal me një prekje.

Harta: dy persona live në Tiranë, Elsa dhe Dea; poshtë “Vendndodhja jote shihet live” me butonin Ndalo.

Të mbron ngaNjë ndarje e harruar që vazhdon me ditë, dhe një server që do të dinte ku je.

Si ta përdorësh

Në bisedë prek dhe Ndaj vendndodhjen me …, pastaj zgjidh 15 min, 1 orë ose 24 orë.
Te Harta sheh kush ndan live me ty, dhe sa kohë i mbetet ndarjes sate.
Prek Afër në krye të Lidhjet: te Kush më sheh prek Ndalo të gjitha.

Kufiri

Harta është Google Maps, ndaj Google sheh cilën zonë shfaq telefoni, jo pozicionin e kujt. Serveri sheh që ndan, me kë dhe deri kur, por jo koordinatat. Kjo shtresë përdor fshehtëzim klasik (RSA + AES-GCM), jo post-kuantik.

Nën kapakServeri refuzon ndarje më të gjata se 24 orë · shikuesi humbet aksesin në skadim ose kur bllokohet · gjurma fshihet pas 2 orësh

15Afri Guard

Një roje kundër mashtrimeve, brenda telefonit.

Afri Guard kontrollon në telefon mesazhet dhe linket që merr, si dhe çdo foto e kod QR kur e hap, për mashtrime e phishing, dhe të paralajmëron para se t’i dërgosh dikujt një kod ose fjalëkalim, pa nxjerrë asgjë nga telefoni.

Paralajmërim i Afri Guard, rrezik i lartë: mesazhi kërkon fjalëkalim, kod ose të dhëna llogarie; analizuar vetëm në telefon; butonat Kuptova dhe Blloko.

Afri Guard para dërgimit: duket sikur po dërgon një kod, fjalëkalim ose numër karte; Dërgo gjithsesi ose Anulo.

Të mbron nga“Banka” që kërkon kodin, “dogana” që kërkon një pagesë dhe linqet që imitojnë faqe të njohura.

Si ta përdorësh

Është gjithmonë aktiv; s’ke asgjë për të ndezur.
Mbaj shtypur një mesazh dhe prek Skano me Afri Guard për një kontroll të menjëhershëm.
Cilësimet, Afri Guard, Ndjeshmëria cakton sa i rreptë të jetë.

Kufiri

Punon me rregulla në telefon: nuk është inteligjencë artificiale dhe nuk pyet asnjë shërbim në cloud. Mund t’i shpëtojë diçka ose të japë alarm të rremë, dhe nuk është antivirus.

Nën kapakRregulla për domene që imitojnë, listë bllokimi e integruar, modele mashtrimi · OCR dhe lexim QR me ML Kit, në telefon

VI

Si është ndërtuar

Të dhënat, shpejtësia dhe dizajni.

16Të dhënat

Pa reklama. Pa gjurmues. Baza e të dhënave në BE.

Afri nuk ka reklama dhe nuk përmban SDK analitike apo gjurmues. Raportet e rrëzimeve dërgohen vetëm nëse i ndez vetë, dhe baza e të dhënave dhe funksionet e serverit ndodhen në rajonin e BE-së.

Kërkimi brenda vulës: “Kërkon vetëm në këtë telefon. Vetëm «@» pyet serverin.”

Leja për ID-në e reklamave hiqet me qëllim nga aplikacioni.
Kërkimi bëhet vetëm në telefon; vetëm “@” pyet serverin. Mesazhet sensitive dhe vulat s’kërkohen.
Përkthimi bëhet në telefon; modeli i gjuhës shkarkohet nga Google herën e parë.
S’krijohen parapamje linqesh: një link s’zbulon asgjë derisa ta hapësh.
Backup-i i historikut është i fikur si parazgjedhje dhe s’përfshin media, mesazhe sensitive apo që zhduken.
Raporte defektesh te Cilësimet, App mbetet i fikur derisa ta ndezësh.

Kufiri

Afri mbështetet në shërbime të Google: Firebase (llogaria, njoftimet, App Check), Google Maps dhe reCAPTCHA për Guest. Fotot, videot, mesazhet zanore dhe skedarët ruhen të fshehtëzuara në SHBA, ku as Afri, as Google s’i lexojnë dot; edhe hyrja në llogari përpunohet në SHBA. Çdo rrjedhë e të dhënave përshkruhet te Politika e privatësisë.

Nën kapakFirestore: eur3 (BE) · Cloud Functions: europe-west1 · releja e thirrjeve: Gjermani · media e fshehtëzuar: us-east1 (SHBA) · hyrja: Firebase Authentication (SHBA)

17Rrufe

Mesazhi shfaqet në çast.

Mesazhi yt shfaqet në çast sapo prek “Dërgo”, edhe pa internet, dhe niset vetë sapo kthehet rrjeti. Njoftimet dhe thirrjet u rindërtuan që të vijnë më shpejt.

Kufiri

“Në çast” është flluska në ekranin tënd; dorëzimi varet nga rrjeti dhe nga telefoni i marrësit. Pa internet, mesazhi pret në radhë: nuk dërgohet.

Nën kapakÇdo mesazh ruhet i vulosur në telefon derisa serveri ta konfirmojë · dërgimi përfundon edhe pasi mbyll aplikacionin · nga versioni 3.0-b282

18Vula e qetë

Çdo ngjyrë ka një kuptim.

Afri ka identitetin e vet, “Vula e qetë”: një temë e errët dhe e qetë ku çdo ngjyrë ka vetëm një kuptim, me vulën prej dylli si stolinë të vetme, në 5 gjuhë.